Alatau City Authority-де Alatau Advance Air Group (AAAG) және қытайлық China Machinery Engineering Corporation (CMEC) компаниясы өкілдерімен кездесу өтті, оның қорытындысы бойынша тараптар Алатау қаласында «OIZ TULIP» арнайы индустриялық аймағын дамыту бойынша өзара түсіністік туралы үшжақты меморандумға қол қойды.
Құжат индустриялық аймақты жобалау, қаржыландыру, салу және кейіннен пайдалану мәселелерінде қатысушылардың құзыреттері мен ресурстарын біріктіру арқылы жоба тұжырымдамасынан оны тәжірибеде іске асыруға көшуге бағытталған.
«Меморандум толық циклді қамтиды: дайындық, құрылыс және пайдалану. Басым салаларға төмен биіктік экономикасы, машина жасау, энергетика, құрылыс материалдары және Smart City кіреді. Алатау сондай-ақ жасанды интеллект басқаратын қала ретінде жобалануда, сондықтан ақылды әрі жасыл саябақ әуелден-ақ біздің мұратымызға сәйкес келеді. CMEC-тің инжинирингте, EPC-жобаларды іске асыруда және өнеркәсіптік инвестицияларда тәжірибесі бар», – деп атап өтті Alatau City Authority Бас атқарушы директоры Әлішер Әбдіқадыров.
Жоба цифрлық технологияларды, жасанды интеллектіні және орнықты даму қағидаттарын енгізу көзделетін Алатауды дамытудың стратегиялық басымдықтары ескеріле отырып іске асырылады.
Ә. Әбдіқадыров атап өткендей, жобаны іске асыру үшін Алатаудың «Батыс Еуропа – Батыс Қытай» бағытын қоса алғанда, халықаралық көлік-логистикалық дәліздер қиылысында географиялық орналасуы ерекше маңызға ие. Бұл өнеркәсіптік кооперацияны дамыту, өндірістік тізбектерді кеңейту және Қазақстан, Қытай, Орталық Азия елдері арасындағы сауда-экономикалық байланыстарды нығайту үшін қолайлы алғышарттар туғызады.
Меморандум аясында өзара іс-қимылдың негізгі бағыттары айқындалып, қатысушылардың жауапкершілік аймақтары бөлінді. Атап айтқанда, CMEC жобалауда, қаржыландыруға қаражат тартуда, салуда және әлеуетті инвесторлармен жұмыс істеуде жетекші рөл атқарады. Қазақстандық серіктестер жер және ұйымдастыру мәселелерінде қолдау көрсетеді.
Alatau City Authority өз кезегінде мемлекеттік органдармен өзара іс-қимылды үйлестіріп, заңнамада көзделген «Alatau» арнайы экономикалық аймағының артықшылықтарын қолдануға жәрдемдеседі, сондай-ақ өз құзыреті шегінде қажетті келісу рәсімдерінде қолдау көрсетіп отырады.
Кездесу барысында тараптар сондай-ақ жобаны іске асырудың тәжірибелік механизмдерін, қаржыландыру, жобалық құжаттаманы дайындау мәселелерін және ынтымақтастықтың алдағы кезеңдерін талқылады.
Келесі қадам инвестициялық міндеттемелер, қаржыландыру көздері, жобаны іске асыру мерзімдері нақтыланатын негіздемелік келісімді, акционерлік келісімді және EPC-келісімшартты пысықтау болмақ.
«OIZ TULIP» жобасын іске асыру отандық және шетелдік инвестицияларды тартуға, жаңа жұмыс орындарын құруға, Алатауда заманауи өндірістерді орналастыру үшін мүмкіндіктерді арттыруға жол ашады деп күтілуде.
Анықтама түрінде
«OIZ TULIP» арнайы индустриялық аймағы – өндірістік кәсіпорындарды орналастыру, отандық және шетелдік инвесторларды тарту үшін Алатау қаласының аумағында өнеркәсіптік кешен құру жобасы. Жобада қажетті инфрақұрылымды дамыту және экономиканың басым салаларында өндірістерді оқшаулау үшін жағдайлар жасау көзделуде.
China Machinery Engineering Corporation (CMEC) – Қытай ұлттық машина жасау корпорациясының (Sinomach) жетекші еншілес компанияларының бірі, ол инжиниринг, ірі инфрақұрылымдық және өнеркәсіптік жобаларды іске асыру саласында мамандандырылған.
