2026 жылғы 1–3 қарашада Лондонда Alatau City Roadshow инвестициялық роуд-шоуы өтеді, іс-шара халықаралық капиталды тартуға, стратегиялық әріптестікті дамытуға және Қазақстанның жаңа қаласының инвестициялық жобаларын ілгерілетуге бағытталған.
Қазақстандық делегацияны Қазақстан Республикасы Премьер-Министрінің орынбасары Қанат Бозымбаев бастайды. Делегация құрамына мемлекеттік органдардың, Алатау қаласын дамыту жөніндегі кеңестің, Alatau City Authority-дің, қаржы институттарының және іскерлік қоғамдастықтың өкілдері кіреді.
Бағдарламаның басты іс-шарасы – Alatau City Investment Roundtable in London инвестициялық дөңгелек үстелі, ол 2 қарашада британдық бизнес, халықаралық қаржы ұйымдары, инвестициялық қорлар және сарапшылар қоғамдастығы өкілдерінің қатысуымен өтеді.
Іс-шара барысында Alatau City-дің даму тұжырымдамасы, қаланың инвестициялық мүмкіндіктері, заманауи инфрақұрылым құру жоспарлары, сондай-ақ инвесторлар үшін қолайлы жағдай жасауға бағытталған арнаулы құқықтық режимнің ерекшеліктері таныстырылады.
Жеке панельдік сессия институционалдық капиталды тартудың құқықтық тетіктеріне арналады. Қатысушылар ағылшын жалпы құқығының қағидаттарын қолдануды, мемлекеттік-жекешелік әріптестікті, цифрлық активтерді реттеуді, инвестицияларды қорғауды және дауларды шешу тетіктерін талқылайды.
Іскерлік бағдарлама аясында Лондон қор биржасы (London Stock Exchange), Еуропа қайта құру және даму банкі (ЕҚДБ), UK Export Finance, Brookfield Asset Management, J.P. Morgan, Société Générale, Standard Chartered және Citi өкілдерімен кездесулер жоспарланған.
Сондай-ақ британдық мемлекеттік құрылымдар мен білім беру мекемелері өкілдерімен және әлеуетті стратегиялық әріптестермен келіссөздер қарастырылған. Талқылаудың негізгі тақырыптары – инфрақұрылымға инвестициялар тарту, қаржылық құралдарды дамыту, білім беру және халықаралық ынтымақтастық. Инвестициялық дөңгелек үстелдің қорытындысы бойынша Alatau City Authority мен әріптестер арасында қол қойылған құжаттармен алмасу рәсімі жоспарланған.
Лондондағы роуд-шоу Alatau City-ді инвестициялар, инновациялар және орнықты қалалық дамудың Қазақстандағы жаңа орталығы ретінде халықаралық ілгерілетудің кезекті кезеңі болады.