Alatau City Authority Бельгия Королі Филипп пен Патшайым Матильданың Қазақстанға мемлекеттік сапары аясында өткен Қазақстан-Бельгия іскерлік кеңесінде қаланың инвестициялық әлеуетін және Бельгия бизнесі үшін мүмкіндіктерін таныстырды.
Бағдарлама екі елдің мемлекеттік органдары мен іскер топтарының өкілдерін біріктірді. Alatau City Authority Бас атқарушы директоры Әлішер Әбдіқадыров «Еуропа – Орталық Азия: жаңа сауда бағыттары және жаңа мүмкіндіктер» топтық талқылауында сөз сөйледі. Талқылаудың негізгі тақырыбы Ортаңғы дәліздің транзиттік моделінен Қазақстанда өндірістерді орналастыруға және логистикалық сервистерді дамытуға көшу болды.
«Ортаңғы дәліз тек транзиттік бағыт ретінде жұмыс істемеуі керек. Біздің міндетіміз – оның бойында қосымша құн жасау, өндірісті, логистиканы және бизнес-сервистерді біріктіру. Alatau бельгиялық компаниялар жобаларын орналастыра алатын және Қазақстаннан Орталық Азия нарықтарына қызмет көрсете алатын алаңға айналуы мүмкін. Еліміз үшін бұл – жаңа өндірістер, білікті жұмыс орындары және жергілікті өнім берушілер үшін мүмкіндіктер», – деп атап өтті Әлішер Әбдіқадыров.
Іскерлік кеңес барысында Alatau City-де жоғары технологиялық жобаларды толық пысықтауға көшу бекітілген ынтымақтастық туралы екі негіздемелік құжатқа қол қойылды.
Бірінші құжат Alatau City-дегі протондық терапия орталығы – Shipa Zholy жобасын IBA-мен бірлесіп іске асыру ықтималдығын бағалауға қатысты. Тараптар техникалық, клиникалық, коммерциялық, қаржылық және құқықтық жақтарын қарайды, сондай-ақ медициналық және ғылыми-зерттеу кластері параметрлерін, іске асыру моделін, серіктестердің қатысу талаптарын айқындайды.
Екінші құжатқа Alatau City Authority, For.Energy / FSM Global және Caspian Integrity қол қойды. Тараптар аккумуляторлық ұяшықтарды, энергия жинақтау модульдері мен жүйелерін шығару бойынша өндірістік-технологиялық кешен құру мүмкіндігін, алаңға және инженерлік инфрақұрылымға қойылатын талаптарды, сондай-ақ инвестициялық модельді бағалайды. Инвестициялар көлемі мен қатысушылардың міндеттемелері осы жұмыстың қорытындысы бойынша айқындалады.
Ahlers Logistics Директорлар кеңесінің төрағасы Йохан Вандерплатспен қоймалық және мультимодальді инфрақұрылым, халықаралық жеткізілімдер тізбегі және Alatau City-дің Ортаңғы дәліздің өнеркәсіптік-логистикалық торабы ретіндегі рөлі талқыланды. Антверпен-Брюгге кемежайы, ішкі логистикалық желілер және өнеркәсіптік өндіріс біртұтас жүйені құрайтын бельгиялық модель қала үшін қызығушылық тудырады. Alatau-дың 2040 жылға қарай шамамен 2,7 млн шаршы метр қойма қуаттылығын құру жоспарларын ескере отырып, тараптар халықаралық оператордың қатысуымен сынамалы қойма немесе шоғырлау жобасын іске қосу мүмкіндігін қарастырды.
Waterleau компаниясының бас коммерциялық директоры Себастьен Вагеманспен бірге сумен жабдықтау, сарқынды суларды тазарту және оларды өнеркәсіп пен қала инфрақұрылымы үшін қайта пайдалану саласындағы шешімдер, сондай-ақ су жобаларын іске асыру мен қаржыландырудың ықтимал модельдері қарастырылды.
Іскерлік бағдарламаның қорытындысы бойынша Alatau City Authority алаңдарды таңдау, инфрақұрылымдық талаптарды бағалау және тараптардың қатысу модельдерін айқындау бойынша әлеуетті серіктестермен жұмысты жалғастырады.
Анықтама түрінде: Қазақстан-Бельгия іскерлік кеңесі – екіжақты сауда-экономикалық, инвестициялық ынтымақтастықты дамытуға, сондай-ақ екі елдің компаниялары арасында тікелей байланыстар орнатуға арналған алаң.
