Alatau City Authority сауда-экономикалық, ғылыми-техникалық және мәдени ынтымақтастық жөніндегі Үкіметаралық комиссияның 12-ші отырысы шеңберінде Астанада өткен Қазақстан-Британ бизнес-форумында қаланың инвестициялық әлеуетін және британдық компаниялармен ынтымақтастықтың перспективалық бағыттарын ұсынды.
Форум екі елдің мемлекеттік органдарының, қаржы институттарының және іскер топтарының өкілдерін, оның ішінде шамамен 40 британдық компанияны біріктірді.
Ашылу рәсіміне Ұлыбританияның сауда жөніндегі мемлекеттік министрі лорд Анас Сарвар, «Самұрық-Қазына» АҚ басқарма төрағасы Нұрлан Жақыпов, Қазақстанның Ұлыбританиядағы Төтенше және Өкілетті Елшісі Әлібек Бақаев және Ұлыбританияның Қазақстандағы Төтенше және Өкілетті Елшісі Салли Аксуорси қатысты.
Қатысушылар екіжақты қатынастарды одан әрі нығайтудың, сауда-инвестициялық ынтымақтастықты кеңейтудің және бірлескен жобаларды іске асырудың маңыздылығын атап өтті.
«Бүгін біз Harry Dobbs Design, Arup және Worley Consulting тәжірибесін осы ауқымды жобаны іске асыруға жетекшілік ететін қазақстандық әріптестеріміздің күш-жігерімен біріктіре отырып, Alatau City тұжырымдамасын қалай іске асыру керектігін талқылаймыз», – деп атап өтті Ұлыбританияның Қазақстандағы елшісі Салли Аксуорси қаланың дамуы туралы тақырыптық пікірталасты аша отырып.
Іскерлік бағдарлама «Самұрық-Қазына» АҚ және «Астана» халықаралық қаржы орталығы өкілдерінің сөз сөйлеуін, сондай-ақ Alatau City-ді дамытуға және болашақ экономикалық өсуді қаржыландыруға арналған екі тақырыптық пікірталасты қамтыды. Талқылауларға Harry Dobbs Design, Arup, Worley Consulting, London Stock Exchange Group, TheCityUK, UK Export Finance, «Самұрық-Қазына» және «Бәйтерек» холдингінің өкілдері қатысты.
Alatau City Authority-дің Бас атқарушы директоры Әлішер Әбдіқадыров қаланы дамыту тұжырымдамасын, арнаулы құқықтық режимнің ерекшеліктерін және британдық серіктестер үшін инвестициялық мүмкіндіктерді жеке сессияда таныстырды. Ол Alatau-дың Қазақстан экономикасын әртараптандыру, халықаралық ынтымақтастықты дамыту және Орталық Азиядағы жаңа инновация орталығын қалыптастыру үшін стратегиялық маңыздылығын атап өтті.
«Британдық компаниялар қаланы жоспарлау, инженерия, қаржылық қызметтер және инфрақұрылымдық жобаларды басқару саласында айтарлықтай сараптамаға ие. Alatau City үшін бұл әсіресе өзекті, өйткені қала өзінің базалық инфрақұрылымы мен экономикалық моделін қалыптастыру кезеңінде тұр. Біз тек капиталды ғана емес, озық технологияларды, жобалаудың және басқарудың халықаралық стандарттарын тартуға мүмкіндік беретін ынтымақтастыққа мүдделіміз», – деді Әлішер Әбдіқадыров.
Alatau City дамуының негізін 2026 жылғы 8 мамырдағы Конституциялық заңмен белгіленген арнаулы құқықтық режим құрайды. Ол ұзақ мерзімді инвестициялар үшін болжамды жағдайлар жасауға бағытталған кәсіпкерлік қызмет, жерді пайдалану, салық салу және инфрақұрылым салаларындағы жекелеген реттеу жүйесін қалыптастыруды көздейді.
Британдық сараптама қаланың институционалдық және стратегиялық дамуында қазірдің өзінде пайдаланылуда. Саймон Ф. Т. Кокс Реттеуші комиссияны басқарады, Гарри Доббс Алатау қаласын дамыту жөніндегі кеңестің құрамына кіреді. Arup компаниясы Alatau City-дің ұзақ мерзімді даму жоспары мен мастер-жоспарын әзірлеуде. Стратегиялық құжаттарды дайындау 2026 жылғы желтоқсанда аяқталуы тиіс деп жоспарланған.
Қазіргі уақытта Alatau City-дің инвестициялық портфелі 55 мыңнан астам жұмыс орнын құруды көздейтін, әлеуетті инвестиция көлемі шамамен 6,9 млрд доллар болатын 67 жобаны қамтиды. Басым бағыттар өнеркәсіпті, логистиканы, энергетиканы, іскерлік және әлеуметтік инфрақұрылымды, білім беруді, ғылыми зерттеулерді және цифрлық технологияларды қамтиды.
Alatau британдық компаниялар үшін көлік-логистикалық және инженерлік инфрақұрылымды жобалау мен дамытуға, қаланы басқарудың интеллектуалдық жүйелерін, жасанды интеллект технологиялары мен цифрлық егіздерді ендіруге қатысу мүмкіндіктерін ашады. Британдық қаржы институттарын инфрақұрылымдық жобаларды құрылымдауға және қаржыландыруға, оның ішінде мемлекеттік-жекешелік әріптестік тетіктерін және перспективалық цифрлық қаржы құралдарын пайдалана отырып тарту бөлек қызығушылық тудырады.
Alatau City Authority-дің бизнес-форумға қатысуы халықаралық инвестициялық ынтымақтастықты кеңейту жөніндегі дәйекті жұмыстың бір бөлігі болды. 2026 жылғы қарашада Alatau City-дің Ұлыбританиядағы инвестициялық роуд-шоуы өткізілуі жоспарланған, оның барысында британдық инвесторлармен, қаржы институттарымен және технологиялық компаниялармен нақты келіссөздерді жалғастыру көзделеді.
Анықтама: Қазақстан-Британ үкіметаралық комиссиясы 2013 жылдан бастап жұмыс істейді және екіжақты сауда-экономикалық, инвестициялық және салалық ынтымақтастықты дамытуға арналған алаң болып табылады.